Xalqaro atom energiyasi agentligi Bosh konferensiyasining 66-sessiyasi doirasida ikki tomonlama uchrashuvlar o‘tkazilmoqda
29.09.2022 | scis.uz

O‘zbekiston Respublikasi delegasiyasi Xalqaro atom energiyasi agentligi (XAEA) yillik Bosh konferensiyasining navbatdagi 66-sessiyasi doirasida ХAEA bosh direktori Rafael Mariano Grossi bilan uchrashdi.

Uchrashuv chog‘ida R.Grossi amalga oshirilayotgan ishlar va ikki tomonlama hamkorlikning faol o‘sib borayotganini alohida ta'kidladi, shuningdek har bir sohada O‘zbekiston va XAEA o‘rtasida hamkorlikdagi amalga oshirayotgan ishlaridagi ko‘rsatkichlar boshqa mamlakatlar uchun o‘rnak bo‘la olishini yuqori baholadi.

Bundan tashqari, R.Grossi O‘zbekistoning saraton kasalligini davolash dasturini rivojlantirishdagi muvafaqqiyatiga alohida to‘xtalib o‘tdi. Va u saraton bilan kurashish bo‘yicha XAEAning “Umid uchqunlari” nomli yangi tashabbusi ish boshlaganini hamda XAEAga a'zo mamlakatlar fuqarolari uchun yadro tibbiyoti yordamida saraton kasalligini tekshirib, davolashda xalqaro moliya institutlarini jalb qilishga har tomonlama yordam beruvchi birinchi pilot dasturini O‘zbekiston bilan amalga oshirishga tayyorligini bildirdi.

R.Grossi kelayotgan yilda eng avvalo tibbiyotda yadro texnologiyalarini ishlatishda amalga oshirilayotgan ishlar  bilan tanishish uchun O‘zbekistonga kelish istagini bildirdi.

Shuningdek, O‘zbekiston delegasiyasining Hindiston delegasiyasi bilan uchrashuvi bo‘lib o‘tdi. Uchrashuv davomida tomonlar o‘zaro hamkorlik masalalari bo‘yicha Memorandum imzoladilar. Memorandumni amalga oshirish atom energetikasi xavfsizligini ta'minlashda tajriba almashish asosida tartibga soluvchi organning salohiyatini oshirish uchun qo‘shimcha imkoniyatlar  yaratadi.