O‘zbekiston KBRYa akademiyasida ishtirok etmoqda
30.09.2022 | scis.uz

Kimyoviy, biologik, radiologik va yadro xavflarini minimallashtirish bo‘yicha Yevropa Ittifoqi Ilg‘or tajriba markazlarining  Markaziy Osiyo bo‘yicha Mintaqaviy kotibiyati rahbari – Sanoat xavfsizligi davlat qo‘mitasi raisi Baxtiyor G‘ulomov, O‘zbekiston Respublikasi milliy koordinatori Otabek Qosimov kimyoviy, biologik, radiologik va yadro xavflarini minimallashtirish bo‘yicha Yevropa Ittifoqi Ilg‘or tajriba  markazlari  tashabbusi doirasida Italiyaning Turin shahrida  Milliy koordinatorlar va kotibiyatlar rahbarlari akademiyasida ishtirok etmoqda.

Akademiya Yevropa Ittifoqi Ilg‘or tajriba  markazlarining milliy koordinatorlari va kotibiyatlari rahbarlarining ko‘nikmalari va bilimlarini rivojlantirish maqsadida izchil ta'limni ta'minlash uchun platforma hisoblanadi. Akademiyaning taklifi 2019-yil dekabr oyida Bryusselda bo‘lib o‘tgan Kotibiyat rahbarlarining yettinchi xalqaro yig‘ilishida 2020 yil uchun mintaqalararo yo‘l xaritasi doirasida Kotibiyatlar, Yevropa Komissiyasi va YuNIKRI rahbarlari tomonidan bir ovozdan ma'qullangan edi. COVID-19 pandemiyasi natijasida yuzaga kelgan qiyinchiliklar va cheklovlar tufayli taklif qilingan tashabbusni to‘xtatib turishga to‘g‘ri keldi.

Akademiya KBRYa haqidagi bilimlarni oshirish va KBRYa xavflarini minimallashtirish bo‘yicha Yevropa Ittifoqi Ilg‘or tajriba  markazlarining  Akademiyasi tadqiqoti davomida (so‘rovda 36 mamlakat ishtirok etdi) aniqlangan ko‘nikmalarni rivojlantirishga qaratilgan). Dasturga kiritilgan mavzular Yevropa Ittifoqi Ilg‘or tajriba markazlarining   tashabbusining samaradorligi, ko‘rinishi va barqarorligini yanada oshirish uchun juda muhim ahamiyatga ega. Bundan tashqari, Akademiya turli mamlakatlar va mintaqalarning milliy koordinatorlari o‘rtasida o‘zaro harakatlar va hamkorlikni mustahkamlash uchun ajoyib imkoniyat yaratdi.

Akademiya sessiyasida KBRYa sohasida xavfsizlik masalalari, Yevropa Ittifoqi Ilg‘or tajriba markazlarining strategiyasi, tuzilishi va xavflarni kamaytirishga yondashuvlar muhokama qilinadi, turli interaktiv sessiyalar, "Kimyoviy yoki biologik qurollarni qo‘llash bilan sodir etilgan jinoyatlar bo‘yicha prokurorlar uchun qo‘llanma" mavzusida seminar bo‘lib o‘tadi. Shuningdek, muhim mavzulardan biri - KBRYa to‘g‘risida noto‘g‘ri ma'lumotga qarshi kurashga to‘xtalib o‘tiladi va muhokama qilinadi, yolg‘on ma'lumotlar va dezinformasiya o‘rtasidagi farqlar, qo‘llaniladigan dezinformasiya usullari, uning oldini olish uchun dezinformasiyani dastlabki va yakuniy ochib tashlash usullari  muhokama qilinadi.

Ma'lumot uchun: Kimyoviy, biologik, radiologik va yadro xavflarini minimallashtirish bo‘yicha Yevropa Ittifoqi Ilg‘or tajriba  markazlari tashabbusi Yevropa Komissiyasi tomonidan moliyalashtiriladi va Birlashgan Millatlar Tashkilotining Mintaqalararo jinoyatchilik va odil sud masalalari ilmiy - tadqiqot instituti (YuNIKRI) hamda Yevropa Komissiyasining Biolashgan tadqiqot markazi bilan hamkorlikda amalga oshiriladi.

Ushbu tashabbusni amalga oshirishda Yevropa tashqi aloqalar xizmati ham ishtirok etadi. Tashabbus milliy, mintaqaviy va xalqaro miqyosda  kelishilgan va samarali hamkorlik orqali tegishli xalqaro va mintaqaviy tashkilotlar, Yevropa Ittifoqiga a'zo davlatlar va boshqa manfaatdor tomonlarning texnik ko‘magida ishlab chiqilgan. Tashabbusda dunyoning sakkiz mintaqasidagi 60 dan ortiq davlatlar ishtirok etmoqda.