Istirohat bog‘lari attraksionlarini nazorat qilish bo‘yicha olib borilgan ishlar natijalari bo‘yicha brifing o‘tkazildi
07.11.2022 | scis.uz

Bugun O‘zbekiston Respublikasi Prezidenti Administratsiyasi huzuridagi Axborot va ommaviy kommunikasiyalar agentligida  Sanoat xavfsizligi davlat qo‘mitasi axborot xizmati tomonidan respublikamizdagi istirohat bog‘laridagi  attraksionlarni nazorat qilish bo‘yicha olib borilgan ishlar natijalariga bag‘ishlangan brifing o‘tkazildi.

Brifingda quyidagilar ma'lum qilindi.

1. Joriy yil davomida Madaniyat va istirohat bog‘lari attraksionlari bilan bog‘liq soha faoliyatiga oid qonunchilikni takomillashtirish borasida:

- O‘zbekiston Respublikasi Prezidentining 2021 yil 30 apreldagiPF-6218-son “Milliy qonunchilik bazasini kompleks tizimlashtirish chora-tadbirlari to‘g‘risida”gi Farmoni ijrosi doirasida Sanoat xavfsizligi davlat qo‘mitasi tomonidan “Attraksionlardan foydalanish va ularga texnik xizmat ko‘rsatish qoidalari” ishlab chiqilib Qo‘mitaning 2022 yil 16 martdagi qarori bilan tasdiqlandi va Adliya vazirligi tomonidan 2022 yil 18 aprelda 75-son bilan normativ-texnik hujjat sifatida hisobga olindi.

- Shuningdek, O‘zbekiston Respublikasi Vazirlar Mahkamasi Rayosati majlisining 2020 yil 18 noyabrdagi 143-son bayoni bilan tasdiqlangan chora-tadbirlar rejasining ijrosini ta'minlash maqsadida Sanoat xavfsizligi davlat qo‘mitasi va Texnik jihatdan tartibga solish agentligi bilan birgalikda “Attraksionlar xavfsizligi to‘g‘risidagi umumiy texnik reglamentni tasdiqlash haqida”gi Vazirlar Mahkamasining qarori loyihasi ishlab chiqilib, Hukumatga tasdiqlash uchun kiritilgan.

- Shu bilan birga, O‘zbekiston Respublikasi Prezidentining “Tadbirkorlik sub'ektlarining huquqiy himoyasini yanada kuchaytirish chora-tadbirlari to‘g‘risida”gi Farmoni loyihasi yuzasidan Sanoat xavfsizligi davlat qo‘mitasi takliflari berildi.

     Xususan, mazkur Farmon loyihasida Vakolatli organ bilan kelishilgan holda va xabardor etish tartibida tadbirkorlik sub'ektlari faoliyatida o‘tkaziladigan tekshiruvlar ro‘yxatiga “Istirohat bog‘lari attraksionlaridan foydalanish borasidagi qonunchilik hujjatlari va texnik jihatdan tartibga solish sohasidagi normativ hujjatlar talablariga yuridik va jismoniy shaxslar tomonidan rioya etilishi ustidan davlat nazoratini amalga oshirish” bo‘yicha takliflar bildirilgan.

- Bundan tashqari, Sanoat xavfsizligi davlat qo‘mitasi tomonidan “Xavfli ishlab chiqarish ob'ektlari, ulardagi texnik qurilmalar hamda istirohat bog‘laridagi attraksionlar faoliyatini to‘xtatib turish to‘g‘risidagi nizomni tasdiqlash haqida”gi Vazirlar Mahkamasining qarori loyihasi ishlab chiqilib, Hukumatga tasdiqlash uchun kiritilgan.

- O‘zbekiston Respublikasi Vazirlar Mahkamasining 2022 yil 5 oktyabrdagi 566-son “Lisenziyalash va ruxsat berish tartib-taomillari takomillashtirilishi munosabati bilan O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek, ba'zilarini o‘z kuchini yo‘qotgan deb hisoblash to‘g‘risida”gi qarori qabul qilinib, unga asosan Vazirlar Mahkamasining 2022 yil 21 fevraldagi 80-son qarori bilan tasdiqlangan Maxsus elektron tizim orqali ayrim faoliyat turlarini lisenziyalash tartibi to‘g‘risidagi yagona nizomga o‘zgartirish va qo‘shimchalar sifatida “Portlash xavfi bo‘lgan texnologik yangi jarayonlar va asbob-uskunalarni, istirohat bog‘lari attraksionlarini montaj qilish, ta'mirlash va ishga tushirish, shuningdek, xavfli ishlab chiqarish ob'ektlarida qo‘llaniladigan texnik qurilmalardan foydalanish uchun ruxsatnoma pasport bilan to‘ldirildi.

     Endilikda, ushbu qarorga asosan madaniyat va istirohat bog‘larida, shuningdek, boshqa ko‘ngilochar maskanlarda attraksionlardan foydalanish uchun mavsum oldidan ruxsatnoma olinishi belgilandi.

  1. Qo‘mita tomonidan joriy yil davomida o‘tkazilgan tekshiruvlar va nazorat-profilaktika ishlari

- Tadbirkorlik sub'ektlarida jami 43 ta tekshiruv tadbirlari o‘tkazildi.

 Shulardan, Qoraqalpog‘iston Respublikasida 5 ta, Jizzax viloyatida 8 ta va Farg‘ona viloyatida 30 ta tekshiruv o‘tkazilib, jami 354 ta qonun buzilishi holatlari aniqlandi.

- Qonun buzilishi holatlariga yo‘l qo‘ygan 32 nafar mansabdor shaxsga nisbatan O‘zbekiston Respublikasi Ma'muriy javobgarlik to‘g‘risidagi kodeksining 971-moddasi asosan ma'muriy jarima jazosi qo‘llanildi, shuningdek,  aniqlangan kamchiliklar bartaraf etilguniga qadar 59 ta attraksion faoliyati vaqtinchalik to‘xtatildi.

- Madaniyat va istirohat bog‘larida bevosita joylarga chiqqan holda jami 140 ta profilaktika ishlari (tushuntirishlar, davra suhbatlari va seminarlar) tashkil etildi, shuningdek, Qo‘mita vakolati doirasida 60 ta amaliy tadbirlarda qatnashildi.

- Sanoat xavfsizligi davlat qo‘mitasining 2022 yil 16 martdagi qarori bilan tasdiqlangan “Attraksionlardan foydalanish va ularga texnik xizmat ko‘rsatish qoidalari” qo‘llanma tarzida Respublikada joylashgan 143 ta madaniyat va istirohat bog‘lari rahbarlariga yetkazildi.

- Sanoat xavfsizligi davlat qo‘mitasi tomonidan “Istirohat bog‘laridagi attraksionlarni ro‘yxatga olish yo‘riqnoma”si ishlab chiqilgan bo‘lib, 2020-2022 yillar mobaynida, madaniyat va istirohat bog‘larida o‘rnatilgan 633 ta attraksion pasportlari ro‘yxatga olindi.

Istirohat bog‘lari attraksionlaridan foydalanish bo‘yicha tashkil etilgan maxsus o‘quv kurslarida 670 nafar xodim (operator) o‘qitilib, bilimlar sinovidan o‘tkazildi.